Local News

စေ့စပ်ဆွေးနွေးရေး လမ်းစဉ်ကို ဦးတည်လျှောက်လှမ်းမည် မဟုတ်ကြောင်း ဦမင်းကိုနိုင်က ပြော

စေ့စပ်ဆွေးနွေးရေး လမ်းစဉ်ကို ဦးတည်လျှောက်လှမ်းမည် မဟုတ်ကြောင်း ဦမင်းကိုနိုင်က ပြော

စစ်အာဏာရှင်များ စိတ်တိုင်းကျ ရေးဆွဲခဲ့သော ၂၀၀၈ ဖွဲ့စည်းပုံ အခြေခံဥပဒေအောက်ကို ပြန်သွားမည် မဟုတ်ကြောင်း အမျိုးသားညီညွတ်ရေး အတိုင်ပင်ခံကောင်စီ( NUCC )တွင် ပါဝင်သည့် ၈၈ မျိုးဆက် ငြိမ်းချမ်းရေးနှင့် ပွင့်လင်းလူ့အဖွဲ့အစည်း ခေါင်းဆောင် ဦးမင်းကိုနိုင်က ပြောသည်။

ယနေ့ နိုဝင်ဘာလ ၁၆ ရက် နံနက်ပိုင်းက ကျင်းပပြုလုပ်သည့် ဖက်ဒရယ် ဒီမိုကရေစီ တည်ဆောက်ရေးအတွက် အရေးပါသော အမျိုးသားညီညွတ်ရေး အတိုင်ပင်ခံကောင်စီ (NUCC) သတင်းစာ ရှင်းလင်းပွဲတွင် ထိုသို့ ပြောကြားခဲ့ခြင်း ဖြစ်သည်။

“၂၀၀၈ ဖွဲ့စည်းပုံ အခြေခံ ဥပဒေအောက်ကို ပြန်သွားမှာ မဟုတ်ဘူး။ ဒါကတော့ သေချာတယ်။ ဒီလောက်ဆို တော်တော်ကြီးကို သဘောပေါက်မယ်လို့ ထင်တယ်” ဟု ဦးမင်းကိုနိုင်က ပြောသည်။

လက်ရှိတွင် ဖက်ဒရယ် ဒီမိုကရေစီ ပဋိညာဉ် မူကြမ်းလည်း ရေးဆွဲထားပြီး ယင်းလမ်းစဉ်အတိုင်း ဆက်သွားနေခြင်းဖြစ်သည့်အတွက် NUCC အပါအဝင် တော်လှန်ရေး အင်အားစုများသည် အာဏာသိမ်း စစ်ကောင်စီနှင့် စေ့စပ်ဆွေးနွေးရေး လမ်းစဉ်ကို ဦးတည်လျှောက်လှမ်းမည် မဟုတ်ကြောင်း ဦမင်းကိုနိုင်က ပြောသည်။

NUCC ကို အဖွဲ့ဝင် အစုအဖွဲ့ ၂၈ ခုဖြင့် ဖွဲ့စည်းထားပြီး ယင်းအထဲတွင် ကရင်အမျိုးသားအစည်းအရုံး (KNU) ၊ ကရင်နီ(ကယား) ပြည်နယ်အတိုင်ပင်ခံ ကောင်စီနှင့် ကြားကာလ ချင်းအမျိုးသား အတိုင်ပင်ခံကောင်စီအပါအဝင် တိုင်းရင်းသား လက်နက်ကိုင် အဖွဲ့ ရှစ်ဖွဲ့ ပါဝင်သည်။

ယင်းအပြင် စစ်အာဏာရှင် ဖြုတ်ချရေးကာလအတွက် ရေးဆွဲပြီးဖြစ်သော ကြားကာလ ဖက်ဒရယ်ဒီမိုကရေစီ ဖွဲ့စည်းပုံ အခြေခံဥပဒေကိုလည်း လာမည့် ဒီဇင်ဘာလတွင် ကျင်းပမည့် ပြည်သူ့ညီလာခံတွင် အတည်ပြုပြဌာန်းသွားမည်ဖြစ်ကြောင်း ယနေ့ပြုလုပ်သည့် သတင်းစာရှင်းလင်းပွဲတွင် NUCC တာဝန်ရှိသူများက ပြောသည်။

Ref မဇ္ဈိမ

About the author

admin

Add Comment

Click here to post a comment