Local News

ဒေါ်အောင်ဆန်းစုကြည်အမှုတွေထဲ တမှု ပထမဆုံးတရားရုံးစွဲချက်တင်

ဒေါ်အောင်ဆန်းစုကြည်အမှုတွေထဲ တမှု ပထမဆုံးတရားရုံးစွဲချက်တင်ပြစ်ဒဏ်တွေ ပေါင်းလိုက်ရင် ထောင် ၈၇ နှစ်အထိ ချမှတ်ခံရနိုင်

ဒေါ်အောင်ဆန်းစုကြည်၊ ဦးဝင်းမြင့်နဲ့ ဒေါက်တာမျိုးအောင်တို့ကို အများပြည်သူ တည်ငြိမ်အေးချမ်းမှု ပျက်ပြားစေအောင်လုပ်ဆောင်မှုဆိုတဲ့ ရာဇသတ်ကြီးဥပဒေ ပုဒ်မ ၅၀၅-ခနဲ့ တရားရုံးက စွဲချက်တင် လိုက်ပါ တယ်။ ဒီလို စွဲချက်တင်လိုက်တာနဲ့ပတ်သတ်ပြီး အဆင့်ဆင့် အယူခံဝင် ပယ်ဖျက်နိုင်ဖို့ ကြိုးစားမယ်လို့ သူ့ ရှေ့နေတွေကဆိုပါတယ်။ ဒီကနေ့ကြားနာမှု အခြေအနေနဲ့ပတ်သတ်လို့ ရန်ကုန်က ပေးပို့တဲ့သတင်းကို နန်းလောဝ်ပြောပြမှာပါ။

အမှုပေါင်း ၁၁မှုနဲ့ ရင်ဆိုင်နေရတဲ့ ဒေါ်အောင်ဆန်းစုကြည်ရဲ့ အမှုတွေထဲက အများပြည်သူ တည်ငြိမ် အေးချမ်းမှု ပျက်ပြားစေအောင်လုပ်ဆောင်မှုဆိုတဲ့ ရာဇသတ်ကြီးဥပဒေ ပုဒ်မ ၅၀၅-ခနဲ့ စွဲဆိုထားတဲ့ အမှုတမှုကို နေပြည်တော်အထူးတရားရုံးက စွဲချက်လက်ခံလိုက်တာပါ။ ဒေါ်အောင်ဆန်းစုကြည်အပါအဝင် အမှုတွဲသုံးဦးစလုံးကတော့ ဒီအမှုမှာ အပြစ်မရှိကြောင်း တရားရုံးကိုတုန့်ပြန်ထားတယ်လို့ ဒေါ်အောင်ဆန်းစုကြည်ရှေနေတဦးဖြစ်တဲ့ ဒေါ်မင်းမင်းစိုးက VOA ကို ပြောပါတယ်။

“၅၀၅-ခ အမှုကစွဲချက်တင်တဲ့ အမိန့်ကိုချလိုက်တယ်ရှင့်။ ချလိုက်ပြီးတော့မှတဦးဆီကို ဦးဝင်းမြင့်ပါ ၃ဦးပြောထားလို့ ၅၀၅-ခ နဲ့ပတ်သတ်လို့ ဦးဝင်းမြင့်ပါ ၃ဦးကို ၅၀၅-ခ အမိန့်နဲ့ စွဲချက်တင်တယ် အဲဒီအတွက်ကြောင့် ဒီအမှုနဲ့ပတ်သတ်လို့ အပြစ်ရှိလား မရှိလားမေးတော့ မရှိဘူးဖြေပါတယ်။ ၃ဦးစလုံးကိုမေးတော့ အပြစ်မရှိကြောင်းဖြေပါတယ်။ စွဲချက် တင်ပြီးနောက်မှာတော့ ပြန်ခေါ်သက်သေ ၂ဦးကို ပြန်ခေါ်ဖို့ လျှောက်လို့ အဲ ၂ဦးကိုပြန်လည်စစ်ဆေး ဖို့ နောက်ရုံးချိန်းမှာ ချိန်းပါတယ်ရှင့်။ ဒီနေ့သဘာဝဘေးက ဦးထွန်းမြင့်အောင်ကစွဲ ထားတဲ့ ၃၇/၂၀၂၁ အမှု အတွက်က တရားလိုပြသက်သေ တဦးကို စစ်ပါတယ်။ ဒီအမှုနဲ့ပတ်သတ်လို့ ၂ဦးကျန်နေတော့ နောက် တပါတ် ၂၈ရက်နေ့မှာဆက်စစ်ဖို့ ချိန်းဆိုပါတယ်။”

ဒီကနေ့ နေပြည်တော်က သီးသန့်တရားရုံးမှာ ဒေါ်အောင်ဆန်းစုကြည်အပေါ် စွဲထားတဲ့ အမှုတွေထဲက ကနဦး နေပြည်တော်မှာစွဲတဲ့ အမှု ၅ခုထဲက အများပြည်သူ တည်ငြိမ်အေးချမ်းမှုပျက်ပြားစေတဲ့ ရာဇသတ်ကြီးဥပဒေ ပုဒ်မ ၅၀၅-ခ နဲ့ သဘာဝဘေး အန္တရာယ်ဆိုင်ရာ စီမံခန့်ခွဲရေး ဥပဒေပုဒ်မ ၂၅ တို့အတွက် ကြားနားစစ်ဆေးခဲ့ပါတယ်။ ဒီလိုစစ်ဆေးတာမှာ ဒေါ်အောင်ဆန်းစုကြည်၊ ဦးဝင်းမြင့်နဲ့ ဒေါက်တာမျိုးအောင်တို့ ၃ဦးပေါင်း တမှု အနေနဲ့ စွဲထားတဲ့ အများပြည်သူ တည်ငြိမ်အေး ချမ်းမှု ပျက်ပြားစေအောင်လုပ်ဆောင်မှုဆိုတဲ့ ရာဇသတ်ကြီးဥပဒေ ပုဒ်မ ၅၀၅-ခစွဲထားတာကို အခုလို စွဲချက်တင်လိုက်တာဖြစ်ပါတယ်။ NLD ဗဟိုအလုပ်အမှုဆောင်အဖွဲ့က ဖေဖော်ဝါရီ ၇ ရက် နဲ့ ဖေဖော်ဝါရီ ၁၃ ရက်မှာထုတ်ပြန်တဲ့ စာနှစ်စောင်နဲ့ပတ်သက်လို့ တာဝန်ရှိတယ်ဆိုပြီး စွဲဆိုထားတာဖြစ် ကာ ဒီပုဒ်မနဲ့ ငြိစွန်းတယ်ဆိုပြီး အခုလို စွဲချက်တင်ဖို့ လုပ်တာဖြစ်ပါတယ်။

ဒီလို စွဲချက်တင်လိုက်တာနဲ့ပတ်သတ်လို့ အဆင့်ဆင့် အယူခံဝင် ပယ်ဖျက်နိုင်ဖို့ ကြိုးစားမယ်လို့ သူမရှေ့နေတွေ ကပြောပါတယ်။ ဘယ်လိုခုခံချေပမလဲဆိုတဲ့ အသေးစိတ်ကိုတော့ ပြောဆိုတာမရှိပေမယ့် အထက်ရုံးအဆင့်ဆင့် ကို တင်သွားဖို့ ကနဦးပြင်ဆင်မယ်လို့ သူမရှေ့နေအဖွဲ့ထဲက ရှေ့နေဦးကြည်ဝင်းက ဗွီအိုအေကိုပြောပါတယ်။

“စွဲချက်ကို ပယ်ဖျက်ပေးဖို့ ခရိုင်ကိုတင်ဖို့လုပ်ထားတယ်။ ပြင် ဆင်မှု တက်ဖို့လေ။ ခရိုင်တင်တယ်ဆို အကျဉ်းနည်းနဲ့ ပလပ်လိုက်တာများတာဘဲ။ အဲတော့တိုင်းဆက်တက် ရမှာပေါ့။ မန္တလေးလွှတ်တော်ကိုဆက်တက်ရမယ်။ မန္တလေးလွှတ်တော်ပြီးမှ တရားလွှတ်တော်ချုပ် ပြည်ထောင်စုတရားလွှတ်တော်ချုပ်အဲလိုဆက်တက်ရမှာပေါ့”

ဒေါ်အောင်ဆန်းစုကြည်ကိုယ်တိုင်ကလည်း အမှုတွေနဲ့ပတ်သတ်လို့ ဘယ်လိုဘဲ အမိန့်ချမှတ်ပါစေ ဥပဒေနဲ့ မညီတဲ့လုပ်ထုံးလုပ်နည်းတွေနဲ့ အရေးယူတာကိုပေါ်လွင်ထင်ရှားအောင်ခုခံချေပပေးဖို့ ရှေ့နေအဖွဲ့ကို တိုက်တွန်း ထားတယ်လို့ ဦးကြည်ဝင်းကပြောပါတယ်။ လက်ရှိအမှုပေါင်း ၁၁မှုနဲ့ ရင်ဆိုင်နေရတဲ့ ဒေါ်အောင်ဆန်းစုကြည်အ နေနဲ့ ဥပဒေပိုင်းဆိုင်ရာ ရင်ဆိုင်ရာမှာ အကောင်းဆုံး ခုခံနိုင်တဲ့ အခြေအနေရှိမရှိနဲ့ပတ်သတ်လို့ ရှေ့နေဦးကြည်ဝင်းကတော့ ဒေါ်အောင်ဆန်းစုကြည်ဘက်က အပြစ်ကျူးလွန်ခြင်းမရှိတာကို ဥပဒေအရ ပေါ်လွင်အောင် စစ်ဆေးနိုင်ဖို့ တာဝန်ပေးထားတဲ့ အတိုင်း စစ်ဆေးမှုတွေဆက်လက်လုပ်သွားမယ်လို့ပြောပါတယ်။

“ခုခံပိုင်ခွင့်ရှိတယ် ခုခံလို့ရတယ် ကိုယ်တို့ရှေ့နေတွေဌားတယ် ရှေ့နေ တွေက ပြန်လှန်မေးခွန်းတွေမေးနိုင်တယ် ပြောနိုင်တယ်။ အမိန့်ချတော့အဲဒီလိုဖြစ်တယ်။ သူတို့ဘာသာ ဘာတွေဘဲလုပ်လုပ် ဒေါ်အောင်ဆန်းစုကြည်က အန်ကယ်တို့ကို တာဝန်ပေးတာက ကျမအမှုတွေကို လုပ်ထုံးလုပ်နည်းအရ မှန်မှန်ကန်ကန်နဲ့ ကျမတို့ကို မှန်မှန်ကန်ကန်ပေါ်လွင်အောင်စစ်ပေးပါဆိုတဲ့ အတိုင်းကျနော်တို့ပေါ်လွင်အောင်စစ်ပေးတာ။ သူတို့ဘာသာအမိန့်ချတာမချတာ ဒါတွေကိုဘာမှမပြော လိုဘူး။ စိတ်လဲမဆိုးဘူး။ အရေးကြီးတာဒေါ်အောင်ဆန်းစုကြည်က အမှုမှန်။ ကျမဟာဘာမှကျူးလွန် တယ်မရှိတာကို ပေါ်အောင်စစ်ပေးဖို့ဘဲ ဒါဘဲစစ်ပေးတာဘဲ အဓိကကတော့”

ဒီကနေ့စစ်ဆေးတဲ့ အမှုတွေကို လာမယ့် စက်တင်ဘာ ၂၈ရက်နေ့မှာဆက်လက်စစ်ဆေးသွားမှာပါ။ ဒေါ်အောင် ဆန်း စုကြည်ကို အဂတိလိုက်စားမှုနဲ့ မန္တလေးမြို့မှာ တရားစွဲထားတဲ့ အမှု ၄ ခုကိုတော့ လာ မယ့်အောက် တိုဘာလ ၁ ရက်နေ့ကစပြီး နေပြည်တော်အထူး တရား ရုံးမှာ သောကြာနေ့တိုင်း တပတ် ခြား တခါ စစ်ဖို့ ရှိနေပါတယ်။ ရန်ကုန်မှာလည်း အဂတိလိုက်စားမှု ဥပဒေနဲ့ စွဲဆိုထားတာရှိပါတယ်။ သူမရဲ့စီးပွားရေးအတိုင်ပင်ခံ သြစတြေးလျနိုင်ငံသား မစ္စတာရှောင်တာနယ် နဲ့ အတူ နိုင်ငံတော်လျှို့ဝှက်ချက်အက်ဥပဒေပုဒ်မ ၃(၁)/ဂနဲ့ ရန်ကုန်မှာ စွဲဆိုထားတဲ့ အမှုကိုလည်း နေပြည်တော်ရွှေ့ပြောင်းလိုက်တာမို့ ဒီအမှုကို လာမယ့် စက်တင်ဘာ (၂၃)ရက်မှာ နေပြည်တော်မှာပဲ စစ်ဆေးဖို့ ရုံးချိန်းပေးထားပါတယ်။

အသက် ၇၆ နှစ်အရွယ် ဒေါ်အောင်ဆန်းစုကြည်ဟာ စစ်အုပ်ချုပ်ရေး ကောင်စီက စွဲဆိုထား တဲ့အမှု တွေရဲ့ အမြင့်ဆုံး ပြစ်ဒဏ်တွေ ပေါင်းလိုက်ရင် ထောင် ၈၇ နှစ်အထိ ချမှတ်ခံရနိုင်တဲ့ အမှုတွေနဲ့ ရင်ဆိုင်နေရတာဖြစ်ပြီး အများပြည်သူ တည်ငြိမ်အေးချမ်းမှု ပျက်ပြားစေအောင်လုပ်ဆောင်မှုဆိုတဲ့ ရာဇသတ်ကြီးဥပဒေ ပုဒ်မ ၅၀၅-ခနဲ့ အပြစ်ရှိတယ်ဆုံးဖြတ်ရင် အမြင့်ဆုံးထောင်ဒဏ် နှစ်နှစ်ထိ ထောင်ဒဏ် တစ်မျိုးမျိူး ဖြစ်စေ၊ ငွေဒဏ် ဖြစ်စေ ၊ ဒဏ်နှစ်ရပ်လုံး ဖြစ်စေ ချမှတ်နိုင်တယ်လို့ ဥပဒေ မှာဖော်ပြထားပါတယ်။

ဒေါ်အောင်ဆန်းစုကြည်ဟာ ပို့ကုန်သွင်းကုန်ဥပဒေ ပုဒ်မ ၈၊ ဆက်သွယ်ရေး ဥပဒေ ပုဒ်မ ၆၇၊ ရာဇသတ် ကြီးဥပဒေ ပုဒ်မ ၅၀၅-ခ၊ သဘာဝဘေး အန္တရာယ်ဆိုင်ရာစီမံခန့်ခွဲရေး ဥပဒေပုဒ်မ ၂၅ နဲ့ (၂)မှု၊ ရန်ကုန် အရှေ့ ပိုင်းခရိုင်တရားရုံးကနေ နေပြည်တော်တရားလွှတ်တော် ကိုလွှဲပြောင်းထား တဲ့ နိုင်ငံတော်လျှို့ ဝှက်ချက် အက်ဥပဒေ ပုဒ်မ ၃-၁ (ဂ) ၊ တခါ မန္တလေးတိုင်းတရားလွှတ်တော်မှာ ထပ်မံစွဲဆိုခံထားရတဲ့ အဂတိလိုက်စားမှုတိုက်ဖျက်ရေးဥပဒေ ပုဒ်မ ၅၅ နဲ့ အမှု ၄ မှု အပြင် ခုနောက်ဆုံး ဗဟန်းမြို့နယ်မှာ အမှုဖွင့်ထားတဲ့ အဂတိလိုက်စားမှု စတဲ့ အမှုပေါင်း ၁၁ မှုနဲ့ ရင်ဆိုင်နေရပါတယ်။

VOA Burmese