Local News

ဒေါ်အောင်ဆန်းစုကြည် အဂတိမှု ၄ မှု တည်ဆဲဥပဒေနဲ့ ငြိစွန်းတာမရှိ

ဒေါ်အောင်ဆန်းစုကြည် အဂတိမှု ၄ မှု တည်ဆဲဥပဒေနဲ့ ငြိစွန်းတာမရှိ

နိုင်ငံတော်အတိုင်ပင်ခံ ဒေါ်အောင်ဆန်းစုကြည်အပေါ် စွဲဆိုထားတဲ့ အဂတိလိုက်စားမှု ၄ မှုမှာ တည်ဆဲ အဂတိလိုက်စားမှု တိုက်ဖျက်ရေး ဥပဒေပါအချက်တွေနဲ့ ငြိစွန်းတာမရှိဘဲ တရားစွဲထားတယ်ဆိုတာ စိစစ်တွေ့ရတယ်လို့ သူ့ရဲ့ ရှေ့နေတွေကပြောပါတယ်။

ဒီတပတ်မှာလည်း စစ်ကောင်စီဘက်က အဓိကသက်သေအဖြစ် ခေါ်ထားတဲ့ ရန်ကုန်တိုင်း ဝန်ကြီးချုပ်ဟောင်း ဦးဖြိုးမင်းသိန်းရဲ့ဇနီး လာရောက် ထွက်ဆိုခြင်းမရှိပါဘူး။ ဒီကနေ့ နေပြည်တော်က အမှုကြားနာပွဲ အခြေအနေကို မမေခက အပြည့်အစုံ ဆက်ပြီး တင်ပြပေးထားပါတယ်။

အဂတိလိုက်စားမှု တိုက်ဖျက်ရေးဥပေဒနဲ့ ဒေါ်အောင်ဆန်းစုကြည်အပေါ် တရားစွဲထားတဲ့ အမှု ၄ မှုကို အပတ်စဉ် သောကြာနေ့တိုင်း စစ်ဆေးနေတာမို့နေပြည်တော် သီးသန့်တရားရုံးမှာ ဒီကနေ့ အောက်တိုဘာ ၂၂ ရက်မှာ ရုံးထုတ် ကြားနာပါတယ်။

ဒီနေ့ အဂတိလိုက်စားမှု ၂ ခုကို စစ်ဆေးခဲ့ပြီး တရားလိုအဖြစ် တရားစွဲထားတဲ့ အဂတိလိုက်စားမှုကော်မရှင်ရဲ့ စုံစမ်းစစ်ဆေးရေးမှူးကို ရှေ့နေတွေက အပြန်အလှန်မေးခွန်းထုတ်ခဲ့ကြပါတယ်။

စစ်ဆေးမေးမြန်းမှုတွေအရ အဂတိလိုက်စားမှုပုဒ်မကို ကျူးလွန်ကြောင်း ခိုင်ခိုင်မာမာ သက်သေမပြနိုင်တာ ထပ်မံတွေ့ခဲ့တယ်လို့ ဒေါ်အောင်ဆန်းစုကြည်ရဲ့ရှေ့နေတဦးက ဗွီအိုအေကိုပြောပါတယ်။

“စစ်တဲ့အခါမှာ တရားလိုရဲ့စုံစမ်းစစ်ဆေးမှုတွေဟာ ဥပဒေနဲ့ညီသလား၊ မညီဘူးလားဆိုတာကို အခု ပြန်လှန်မေးခွန်းတွေမေးနေပြီလေ။…အဲဒီ အဂတိ
လိုက်စားမှုဥပဒေဆိုတာ သတင်းကျော်ဇောရမယ်။ တိုင်စာတွေရှိရမယ်။

လျှောက်ထားချက်တွေ ရှိရမယ်။ အခု ဒေါ်အောင်ဆန်းစုကြည်တို့၊ ဦးမျိုးအောင်တို့၊ ဦးရဲမင်းဦးတို့ ၁ ရက်၊ ၂ လ ၊ ၂၀၂၁ ဟိုဘက်က တိုင်စာကို မရှိတာ။ တိုင်စာမရှိရင် အရေးယူလို့ မရဘူး။ တရက်၊ ၂ လ၊ ၂၀၂၁ ခုနှစ်မှာ အရေးပေါ်ကာလ ပြဌာန်းပြီးတော့ ရာထူးရှိတဲ့သူတွေမှန်သမျှ အကုန်လုံး ထိန်းသိမ်းလိုက်တယ်။

နိုင်ငံတော်အတိုင်ပင်ခံကိုလည်း ထိန်းသိမ်းပြီးတော့မှ …သက်သေတွေကို စစ်ပြီးတော့မှ သက်သေတွေစစ်ပြီးလို့ ရတဲ့အချက်တွေကို တိုင်ချက်ဖွင့်တာဆိုတော့ ရာဇဝတ်ကျင့်ထုံး ဥပဒေ ပုဒ်မ ၁၅၄ နဲ့ မညီတဲ့သဘောတွေ ဖြစ်နေတာပေါ့။”

ဒေါ်အောင်ဆန်းစုကြည်အပေါ် တရားစွဲထားတဲ့ အဂတိအမှုတွေထဲက NLD အစိုးရလက်ထက်က ရန်ကုန်တိုင်း ဝန်ကြီးချုပ် ဦးဖြိုးမင်းသိန်းပေးတဲ့ ရွှေနဲ့ ဒေါ်လာငွေတွေ ယူတယ်ဆိုတဲ့ အမှုအတွက် တရားလိုပြ သက်သေအနေနဲ့ ဦးဖြိုးမင်းသိန်းရဲ့ဇနီးကို စစ်ကောင်စီဘက်က တင်သွင်းထားတာရှိခဲ့ပါတယ်

အဲဒီအမှုအတွက် ပြီးခဲ့တဲ့ အပတ်ရုံးချိန်းမှာကော ဒီတပတ်မှာပါ ရန်ကုန်တိုင်းဝန်ကြီးချုပ်ဟောင်း ဦးဖြိုးမင်းသိန်းရဲ့ ဇနီး ဒေါ်ခင်မိမိကြွယ် အမှုကြားနာပွဲ မလာနိုင်ခဲ့သလို အချိန်အတိုင်းအတာအရလည်း အမှု ၄ မှု စစ်ရမှာဖြစ်ပေမယ့် ၂ မှုကိုသာ စစ်နိုင်ခဲ့တယ် လို့ ဒေါ်အောင်ဆန်းစုကြည်ရဲ့ ရှေ့နေတွေကပြောပါတယ်။ ဒီကနေ့စစ်ဆေးတဲ့ အမှုတွေနဲ့ပတ်သက်လို့ ရှေ့နေကအခုလိုပြောပြပါတယ်။

“ဒီနေ့ လေးမှု စစ်ဖြစ်တယ်။ ပြီးကျတော့ ပြီးခဲ့တဲ့ သောကြာနေ့က တို့ဘက်က ကန့်ကွက်ထားတာလေ။ သက်သေခံ (ဌ-၁) ကန့်ကွက်ထားတာ သူတို့က လက်ခံလိုက်တယ်ပေါ့နော်။ အဲဒီမြေကွက်က ဒေါ်ခင်ကြည်ဖောင်ဒေးရှင်းကနေပြီးတော့ မြေငှားဂရန်ယူထားတာ။

အဲဒါ ဥက္ကဋ္ဌဖြစ်တဲ့ ဒေါ်အောင်ဆန်းစုကြည်က ဖောင်ဒေးရှင်းဥက္ကဋ္ဌအနေနဲ့ ဒါ ယ….၅၅ နဲ့စွဲတာပေါ့။ အမှု စစ်ဆေးရေးအရာရှိတွေက ပြန်လှန်မေးခွန်းတွေ မေးကြတာပေါ့။ စစ်ပြီးတဲ့အခါကျ ရုံးချိန်းက ၂၉ ရက်နေ့ချိန်းတယ်။ အလားတူပဲ- ဖောင်ဒေးရှင်း အဆောက် အဦးပိုင် မြေဝယ်ပြီးတော့ ဆောက်တယ်၊ ၂၃.၈၅ ဧကမှာ လာပြီးဆောက်တာပေါ့။

အဲဒါကို ဒေါ်အောင်ဆန်းစုကြည်နေဖို့ အိမ်ဆောက်တယ် ဆိုပြီးတော့ စွဲတာ။ အဲဒါက ဒီနေ့စပြီးတော့ စစ်တာပေါ့နော်။”

လက်ရှိ စစ်ဆေးကြားနာနေတဲ့ အဂတိလိုက်စားမှု အမှု ၄ မှုမှာဒေါ်အောင်ဆန်းစုကြည်တဦးတည်းကို သီးသန့်စွဲ ဆို ထားတာ ၂ မှု၊ နေပြည်တော်မြို့တော်ဝန် ဒေါက်တာမျိုးအောင်၊

ဒုတိယ မြို့တော်ဝန် ဦးရဲမင်းဦးတို့နဲ့ ပူးတွဲ ၁ မှု၊ နေပြည်တော် စည်ပင်သာယာရေးကော်မတီအဖွဲ့ဝင် ဦးမင်းသူ၊ ဒေါက်တာမျိုးအောင်တို့နဲ့ ပူးတွဲ ၁ မှု တရားစွဲခံထား ရတာဖြစ်ပါတယ်။

အောက်တိုဘာလ ၂၉ ရက် ရှေ့တပတ်သောကြာမှာ ဒေါ်အောင်ဆန်းစုကြည်အပေါ် စွဲဆိုထားတဲ့ အဂတိလိုက်စားမှု တွေကို ဆက်လက်စစ်ဆေးသွားဖို့ ရုံးချိန်းပေးထားပါတယ်။ ဒေါ်အောင်ဆန်းစုကြည်အပေါ် ရန်ကုန်တိုင်းဒေသကြီးမှာ အဂတိလိုက်စားမှုနဲ့စွဲထားတဲ့ အမှုတခုကို

မန္တလေးတိုင်းမှာ ပြောင်းရွှေ့စစ်ဖို့ တရားလွှတ်တော်ချုပ်က ခွင့်ပြုထားပေမဲ့ နေပြည်တော် သီးသန့်တရား ရုံးမှာ ဘယ်တော့ စတင် စစ်ဆေးမယ်ဆိုတဲ့ရက်ကိုလည်း မသိရသေးပါဘူး။လာမယ့် သီတင်းပတ်တွေမှသာ စတင် စစ်ဆေးမယ့်ရုံးချိန်းရက်ကို သိရနိုင်မယ်လို့ ရှေ့နေတွေက ပြောပါတယ်။

Ref VOA

About the author

admin

Add Comment

Click here to post a comment