အမှု ၁၉ မှုအတွက် ထောင်ဒဏ် ၃၃ နှစ်နဲ့ ဒေါ်အောင်ဆန်းစုကြည်

NLD အစိုးရရဲ့ နိုင်ငံတော်အတိုင်ပင်ခံ ဒေါ်အောင်ဆန်းစုကြည်အပေါ် တရားစွဲထားတဲ့ အမှုတွေထဲက နောက်ဆုံးကျန် ၅ မှုအတွက် စုစုပေါင်း ထောင်ဒဏ် ၇ နှစ်ချလိုက်ပါတယ်။

အခုဆိုရင်ဒေါ်အောင်ဆန်းစုကြည်ဟာ အမှုပေါင်း ၁၉ မှုအတွက် စုစုပေါင်း ထောင်ဒဏ် ၃၃ နှစ် ချခံထားရပါတယ်။ သူ့အပေါ် စွဲဆိုထားတဲ့ အမှုတွေအားလုံးအပြီးသတ်သွားပြီမို့ နိုင်ငံရေးအပါအဝင် ထူးခြား ပြောင်းလဲမှုတွေ ရှိလာနိုင်ပါသလား၊ ရန်ကုန်ကစုံစမ်းပေးပို့တဲ့ သတင်းကို အလိမ္မာက တင်ပြပါမယ်။

ဒေါ်အောင်ဆန်းစုကြည်နဲ့ ဦးဝင်းမြင့်တို့ကို စွဲဆိုထားတဲ့အထဲ နောက်ဆုံးအမှုငါးမှုအတွက် နေပြည်တော်အထူးတရားရုံးကနေ ထောင်ဒဏ် ၇နှစ်စီ အသီးသီးအမိန့်ချမှတ်လိုက်တာမို့၊ ဒေါ်အောင်ဆန်းစုကြည်ကို စွဲဆိုထားတဲ့အမှုအားလုံး ပြီးပြတ်သွားပြီလို့ ဆိုနိုင်ပါတယ်။

တချိန်တည်းမှာပဲ အမှုတွေပြီးပြတ်သွားချိန်မှာ သူကို နေအိမ်အကျယ်ချုပ်ပြောင်းရွေ့ထားမယ်ဆိုပြီး သတင်းတွေလည်း ကျယ်ကျယ်ပြန့်ပြန့်ထွက်ခဲ့ပါတယ်။ စစ်ကောင်စီပြောခွင့်ရသူ ဗိုလ်ချုပ်ဇော်မင်းထွန်းကတော့ အမှုတွေအမိန့်ချပြီးရင် သူကို ဘယ်မှာထားမလဲ မသိဘူးလို့သာ တုန့်ပြန်ထားပါတယ်။

တချိန်တည်းမှာပဲ လာမယ့်နှစ်ဆန်းပိုင်းမှာ အကျဉ်းသားတွေကိုလွတ်ငြိမ်းချမ်းသာခွင့်ပေးမယ်ဆိုတဲ့သတင်းတွေထွက်နေတော့၊ စစ်ကောင်စီဖက်က သူပြစ်ဒဏ်တွေကို တစုံတရာလျှော့ပေါ့ပေးမလား မျှော်လင့်သူတွေလည်းရှိပါတယ်။

ပြည်ထောင်စုရှေ့နေများအဖွဲ့ဥက္ကဋ္ဌ လွှတ်တော် ရှေ့နေ ကြီး ဦးကြီးမြင့်ကတော့ စစ်ကောင်စီဖက်ကနေ ဒေါ်အောင်ဆန်းစုကြည်ကို ချမှတ်ထားတဲ့ အမှုတွေလျော့ပေါ့ပေးနိုင်ပေမယ့်၊ လွတ်ငြိမ်းချမ်းသာခွင့် ပေးနိုင်ဖွယ်မရှိဘူးလို့သုံးသပ်ပါတယ်။

“ဒေါ်အောင်ဆန်းစုကြည်ကိုတော့လွတ်လပ်ရေးနေ့မှာမလွတ်ဘူး၊ဒါပေမယ့် ပြစ်ဒဏ်လျော့တဲ့ထဲပါလာနိုင်တယ်။ အကုန်လုံးပြီးသွားပြီဆိုတော့ တပေါင်းထဲပေါ်မှာ ဘယ်လောက်လျော့တယ်ဆိုတာမျိုးပေါ့. ဖြစ်လာနိုင်တယ်။

နောက် ဒေါ်အောင်ဆန်းစုကြည်ကို နိုင်ငံရေးမှာ နလန်မထူနိုင်အောင် လုပ်တာဘဲ၊ ဒါပေမယ့် ဒေါ်အောင်ဆန်းစုကြည်က ပြည်တွင်းပြည်ပမှာခုချိန်ထိ ထောက်ခံမှုအများကြီးရနေဆဲပါ သူ့ကို ပယ်လို့ကိုမရသေးဘူး။ အဲတော့နိုင်ငံတကာမှာ ကြည့်ကောင်းအောင် ပြစ်ဒဏ်လျှော့တဲ့အထဲပါကောင်းပါလာနိုင်တာပေါ့။ လွှတ်တာတော့မလွှတ်ဘူး ရွေးကောက်ပွဲရှိသေးတာကို အဲဒ့ါတော့သေချာတယ် မလွှတ်ပေးဘူး။”

ယခင်အချိန်တုန်းက နိုင်ငံခြားဧည်သည်တွေနဲ့ တွေ့ခွင့်မပေးခဲ့တဲ့ကိစ္စအပေါ်မှာ အမှုမပြီးသတ်လို့ဆိုပြီး စစ်ကောင်စီဖက်က အကြောင်းပြန်တုန့်ပြန်ခဲ့ဖူးပါတယ်။ အဲဒီအတွက် အခုအမှုပြီးပြတ်ချိန်မှာ ပြင်ပနဲ့ တစုံတရာတွေ့ဆုံခွင့်ပေးမလား၊

အထူးသဖြင့် အခု ရောက်နေတဲ့ တရုတ်နိုင်ငံအထူးကိုယ်စားလှယ်နဲ့ တွေ့ဆုံခွင့်ပေးမလား ယူဆနေသူတွေလည်းရှိပါတယ်။ ဒါနဲ့ပတ်သက်လို့တော့ စစ်ကောင်စီဖက်က တစုံတရာ တရားဝင်ထုတ်ပြောတာမျိုးတော့မရှိပါဘူး။ နှစ်ပေါင်း ၇၀ ကျော်အတွင်း မြန်မာ့အရေး ပထမဆုံး ချမှတ်ခဲ့တဲ့ ကုလသမဂ္ဂလုံခြုံရေးကောင်စီ ဆုံးဖြတ်ချက်မှာ ဒေါ်အောင်ဆန်းစုကြည်၊

သမ္မတ ဦးဝင်းမြင့်နဲ့ မတရားဖမ်းဆီးထားသူတွေ ပြန်လွှတ်ပေးဖို့ တောင်းဆိုထားပါတယ်။ တချိန်တည်းမှာလည်းပဲ လာမယ့်ဖေဖော်ဝါရီလဆို စစ်တပ်က အာဏာသိမ်းခဲ့တာ နှစ်နှစ်ပြည့်ပါပြီ။ စစ်ကောင်စီကတော့ အာဏာသိမ်းတယ်လို့ မသုံးပဲ ဖွဲ့စည်းပုံဥပဒေအရ အာဏာလွှဲယူတာလို့ သုံးထားတဲ့အတွက်၊ ဖွဲ့စည်းပုံပါ အရေးပေါ်ကာလဆိုင်ရာပြဌာန်းချက်အရ နှစ်နှစ်အထိ အများဆုံး အာဏာယူလို့ရပါတယ်။

ဒါကြောင့်လည်း ဒေါ်အောင်ဆန်းစုကြည်အမှုတွေပြတ်ပြီးတဲ့နောက်၊ တစုံတရာ နိုင်ငံရေးအရ ထူးခြားမှုတွေဖြစ်လာမလား ယူဆသူတွေလည်းရှိပါတယ်။ ဝါရင့်နိုင်ငံရေးလေ့လာသူတဦးကတော့ ဒေါ်အောင်ဆန်းစုကြည်နဲ့ ဟန်ပြဆွေးနွေးမှုတခုခုဖြစ်လာမလားလို့ ယူဆပါတယ်။

“လာမယ့် ဖေဖော်ဝါရီ ၁ရက်နေ့ဆို သူတို့ ၂၀၀၈ဖွဲ့စည်းပုံအရ သူတို့သက်တမ်းကုန်ပြီ။ ကုန်တော့ ကာလုံပြန်ခေါ် ယာယီသမ္မတကို အာဏာပြန်အပ် ရွေးကောက်ပွဲအတွက်ပြင်ဆင်ဆိုတဲ့ အပြောင်းအလဲလုပ် စရာရှိတယ် သူတို့တွေအနေနဲ့ လမ်းဆုံလမ်းခွကိုရောက်နေတယ်။

ပြည်သူကိုလှည့်စားဖို့ နိုင်ငံတကာကို လက်ခံလာအောင်လုပ်ဖို့အတွက် နိုင်ငံရေးရည်ရွယ်ချက်သူတို့မှာရှိလိမ့်မယ်။ အဲံဒီအတွက် ဟိုတုန်းက ဦးသန်းရွှေလက်ထက်လိုဘဲ လက်ဦးမှုဘယ်လိုယူမလဲစဉ်းစားနိုင်တယ်။ သူတို့အသာဘယ်လိုရမလဲ သူတို့ကိုဘယ်လိုမထိခိုက်မလဲဆိုတဲ့စဉ်းစားချက်ရှိနိုင်တယ်။ အဲလိုစဉ်းစားရင်ဒေါ်အောင်ဆန်းစုကြည်ကို အသံထွက်ခွင့်ပေးလိုက်တာက သူတို့အတွက်မကောင်းဘူးနစ်နာမယ်လို့စဉ်းစားနိုင်တယ်။

ဒေါ်အောင်ဆန်းစုကြည်ကိုအသံထွက်ခွင့်ပေးမယ့်အစား နေအိမ်အကျယ်ချုပ်ထားပြီးတော့ တွေ့ဆုံဆွေး နွေးမှုရှိပါမယ်။ သူတို့ကိုယ်တိုင် ဦးမင်းအောင်လှိုင်ကိုယ်တိုင်တွေ့ဆုံဆွေးနွေးပါမယ် ဒါမှမဟုတ်လဲ ကော်မတီတရပ်ရပ်က တွေ့ဆုံဆွေးနွေးပါမယ်။ တချက်ခုတ် ၃၊ ၄ ချက်ပြတ်မယ့် စဉ်းစားချက်မျိုးသူတို့ မှာမရှိဘူးမပြောနိုင်ဘူး”

အသက် ၇၇ နှစ်အရွယ် ဒေါ်အောင်ဆန်းစုကြည်ဟာ စစ်ကောင်စီက စွဲဆိုထားတဲ့အမှုပေါင်း ၁၄ မှုနဲ့ လက်ရှိမှာ စုစုပေါင်း ထောင်ဒဏ် ၂၆ နှစ်အထိ ချမှတ်ခံရထားပြီးဖြစ်ပြီး နေပြည်တော်အချုပ်ထောင်တွင်းမှာ အကျဉ်းချခံထားရပါတယ်။ ဒီကနေ့ချမှတ်လိုက်တဲ့ နှစ်တွေနဲ့ပေါင်းရင် စုစုပေါင်း ထောင်ဒဏ် ၃၃ နှစ်ဖြစ်ပါတယ်ရှင်။

Leave a Reply

Your email address will not be published. Required fields are marked *